اللہ کے ولی کا تعلق ایمان اور تقویٰ سے ہے، مگر وہ بشر ہیں، انبیاء علیہم السلام کی طرح معصوم (خطا اور گناہ سے محفوظ) نہیں ہوتے۔ ان سے غلطی یا گناہ سرزد ہو سکتا ہے لیکن وہ فوراً رجوع کر لیتے ہیں۔ ولی کے معصوم ہونے کا عقیدہ قرآن و سنت کے خلاف ہے۔ فرمایا کہ
وَمَا أَرْسَلْنَا مِن رَّسُولٍ إِلَّا لِيُطَاعَ بِإِذْنِ اللَّهِ
اور ہم نے کوئی رسول نہیں بھیجا مگر اس لیے کہ اللہ کے حکم سے اس کی اطاعت کی جائے۔
(النساء 64)
یعنی عصمت صرف انبیاء کے لیے ہے تاکہ ان کی اطاعت میں شک نہ رہے۔ اولیاء صالحین بھی گناہ سے بچنے کی کوشش کرتے ہیں، مگر ان سے خطا اور لغزش ہوسکتی ہے۔
نبی ﷺ نے فرمایا
كُلُّ بَنِي آدَمَ خَطَّاءٌ، وَخَيْرُ الْخَطَّائِينَ التَّوَّابُونَ
ہر بنی آدم خطاکار ہے، اور بہترین خطاکار وہ ہیں جو توبہ کرنے والے ہیں۔
(جامع الترمذي، حدیث 2499)
لہٰذا ولی اللہ کی پہچان عصمت نہیں، بلکہ ایمان، تقویٰ اور اطاعت ہے۔ کسی ولی کو معصوم ماننا غلو اور انبیاء کے مقام پر چڑھانے کے مترادف ہے، جو شرک و بدعت کی راہ ہے۔
