نہیں، اللہ کے سوا کسی اور کو پکارنا جائز نہیں۔ الأنعام میں اللہ تعالیٰ فرماتے ہیں
قُلْ أَنَدْعُو مِن دُونِ اللَّهِ مَا لَا يَنفَعُنَا وَلَا يَضُرُّنَا وَنُرَدُّ عَلَىٰ أَعْقَابِنَا بَعْدَ إِذْ هَدَانَا اللَّهُ كَالَّذِي ٱسْتَهْوَتْهُ ٱلشَّيَٰطِينُ فِى ٱلْأَرْضِ حَيْرَانَ لَهُۥ أَصْحَٰبٌ يَدْعُونَهُۥ إِلَى ٱلْهُدَى ٱئْتِنَا ۗ قُلْ إِنَّ هُدَى ٱللَّهِ هُوَ ٱلْهُدَىٰ ۖ وَأُمِرْنَا لِنُسْلِمَ لِرَبِّ ٱلْعَٰلَمِينَ
کہو، کیا ہم اللہ کو چھوڑ کر اُن کو پکاریں جو نہ ہمیں نفع دے سکتے ہیں اور نہ نقصان؟ اور کیا ہم الٹے پاؤں پھر جائیں بعد اس کے کہ اللہ نے ہمیں ہدایت دی، اُس شخص کی طرح جسے شیطانوں نے بیابان میں بھٹکا دیا ہو اور وہ حیران ہو، حالانکہ اُس کے ساتھی اُسے راہِ راست کی طرف بلا رہے ہوں کہ اِدھر آؤ؟ کہہ دو، اللہ کی ہدایت ہی اصل ہدایت ہے، اور ہمیں حکم دیا گیا ہے کہ ہم خود کو ربّ العالمین کے سپرد کر دیں۔
(الانعام – 71)
یہ آیت واضح کرتی ہے کہ صرف اللہ کو پکارنا چاہیے، کیونکہ نفع اور نقصان کا اختیار صرف اُسی کے پاس ہے۔
اللہ کے سوا کسی اور کو پکارنا سخت گمراہی ہے، کیونکہ یہی شرکِ اکبر ہے جو انسان کو اسلام سے خارج کر دیتا ہے۔ قرآن مجید واضح اعلان کرتا ہے:
فَلَا تَدْعُوا مَعَ ٱللَّهِ أَحَدًا
پس اللہ کے ساتھ کسی اور کو مت پکارو
سورۃ الجن: 18
اللہ کی ربوبیت اور الوہیت کا تقاضا ہے کہ پکار، دعا، فریاد، اور التجا صرف اسی سے ہو۔ قبروں، اولیاء، یا انبیاء کو پکارنا، چاہے بطور وسیلہ ہو یا شفاعت، سب “لَا إِلٰهَ” (کسی کو معبود نہ ماننے) کے منافی ہے۔ اللہ نے فرمایا:
وَمَنْ أَضَلُّ مِمَّنْ يَدْعُوا مِن دُونِ ٱللَّهِ مَن لَّا يَسْتَجِيبُ لَهُ إِلَىٰ يَوْمِ ٱلْقِيَٰمَةِ
اور اس سے بڑھ کر گمراہ کون ہے جو اللہ کے سوا اُن کو پکارتا ہے جو قیامت تک جواب بھی نہ دے سکیں
سورۃ الأحقاف: 5
جو بھی اللہ کے سوا کسی کو پکارے، چاہے نبی ہو یا ولی، مردہ ہو یا زندہ، وہ مشرک ہے۔ توحید یہی ہے کہ دعا، نذر، فریاد، مدد، سجدہ، عبادت اور امید صرف اللہ سے ہو۔ رسول اللہ ﷺ نے فرمایا:
“الدعاء هو العبادة”
(دعا ہی عبادت ہے)
ترمذی، حدیث: 2969
لہٰذا جس نے دعا غیراللہ سے کی، اُس نے عبادت غیراللہ کی۔ اور یہی شرک ہے، جسے اللہ کبھی معاف نہیں کرے گا، جیسا کہ فرمایا:
إِنَّ ٱللَّهَ لَا يَغْفِرُ أَن يُشْرَكَ بِهِ
سورۃ النساء: 48
مسلمان کی پہچان یہی ہے کہ وہ صرف اور صرف اللہ کو پکارتا ہے، اور تمام جھوٹے معبودوں کا انکار کرتا ہے۔
